Escuchar
xoves, 19 Novembro, 2020

Un ciclista necesitou atención sanitaria ao mediodía de hoxe tras ser alcanzado por un camión mentres circulada pola estrada que une as localidades de Guillarei e Rañada, no termo municipal pontevedrés de Salvaterra de Miño.

Segundo a información facilitada aos xestores do 112 Galicia polos equipos de emerxencia que acudiron ao lugar do accidente, despois do impacto, o condutor do vehículo de transporte de mercadorías continuou a marcha.

Os feitos tiveron lugar ao fío das 14:30 horas cando os efectivos de urxencias sanitarias contactaron co Centro Integrado de Atención ás Emerxencias de Galicia para informar do suceso.

De inmediato, desde o 112 pasouse aviso aos axentes da Garda Civil de Tráfico e da Policía Local. Ademais, informouse tamén aos Bombeiros do Porriño e aos efectivos do GES-SPEIS Ponteareas por se fose necesaria a súa intervención.

Por outra banda, o 112 Galicia recibiu, tres horas despois, a alerta doutro atropelo a un ciclista, neste caso en Ourense. De acordo co relato da persoa particular que realizou a chamada de aviso, un ciclista foi alcanzado por un turismo na N-120, á altura do punto quilométrico 574, en Canedo, e necesitaba asistencia médica.

Decontado, o persoal do CIAE 112 Galicia puxo os feitos en coñecemento dos profesionais de Urxencias Sanitarias de Galicia-061, dos Bombeiros de Ourense, da Garda Civil de Tráfico, da Policía Local e do servizo de mantemento da vía.