Noticias destacadas no período comprendido entre as 18:00 e as 08:00 horas

Un deshumidificador provoca un incendio nunha vivenda nas Pontes de García Rodríguez sen causar danos persoais

Os Bombeiros do Eume extinguiron esta madrugada un lume nunha vivenda no concello coruñés das Pontes de García Rodríguez. O incendio orixinado nunha estufa provocou que o lume se propagara ao inmobiliario da casa. Por fortuna, ninguén resultou ferido.

O 112 Galicia tivo constancia dos feitos a través da chamada dunha persoa particular ao fío das 4:15 horas, que informaba dun lume na Avenida de Galicia, á altura do número 74. Segundo a información  facilitada aos xestores do Centro Integrado de Atención ás Emerxencias (CIAE), o lume concentrábase na sala da vivenda e todos os ocupantes atopábanse fóra no momento do incidente.

Con estes datos, ademais dos bombeiros, desde o 112 Galicia foron informados tamén os axentes da Policía Local e os voluntarios de Protección Civil da localidade.

Unha vez no punto, os equipos de extinción confirmaron que ardera un deshumidificador e que o fume afectara a parte das escaleiras comúns do edificio. Deste xeito, os servizos de emerxencias procederon a atallar as lapas e ventilar o inmoble.