Noticias destacadas no período comprendido entre as 18:00 e as 08:00 horas

Os equipos de emerxencia acoden a Cartelle para axudar o condutor dun turismo que resultou atrapado tras saírse da vía

Unha persoa resultou ferida de diversa consideración tras saírse da vía o vehículo que conducía en Cartelle. Segundo a información facilitada ao 112 Galicia, foi necesaria a intervención dos equipos de emerxencias para poder liberar ao ferido que quedou atrapado no coche como consecuencia do impacto.

Os xestores do 112 recibiron o aviso dun sinistro na estrada que une A Seara e Cartelle moi preto das oito horas da mañá de hoxe. Durante a comunicación, a testemuña do suceso afirmaba que había un ocupante no interior do vehículo que non era quen de abandonalo polos seus propios medios.

Con esa información, desde o 112 pasouse aviso de inmediato ao equipo de urxencias médicas e aos Bombeiros da Mancomunidade Terras de Celanova. De feito, os profesionais de Urxencias Sanitarias de Galicia-061 comunicaron a mobilización do helicóptero medicalizado con base en Ourense ata o lugar do suceso. Minutos despois, a aeronave tomou terra no lugar dos feitos.

Así, ademais de sanitarios e servizos de emerxencias, o persoal do 112 Galicia solicitou a colaboración dos axentes da Garda Civil de Tráfico e das Agrupacións de Voluntarios de Protección Civil de Celanova e de Cartelle.

Os Bombeiros de Barreiros rescatan a un varón que caeu por un terraplén en Ribadeo

Os servizos de emerxencias rescataron esta mañá a un home que caeu por un terraplén cando camiñaba pola zona do porto do concello lucense de Ribadeo.

Eran as 07:30 horas de hoxe cando o transeúnte se precipitou por un desnivel e rematou apoiado pola vexetación nunha zona de difícil acceso, o que dificultou o seu rescate e atención. Así, tras recibir a chamada de alerta dun compañeiro que se atopaba no lugar dos feitos, os xestores do 112 Galicia pediron a colaboración dos Bombeiros de Barreiros, que conseguiron alcanzar o ferido e sacalo do lugar para que recibise a asistencia médica necesaria.

De feito, tras o rescate, os profesionais de Urxencias Sanitarias de Galicia-061 trataron de efectuar os primeiros coidados médicos in situ.

Cómpre sinalar que desde o 112 Galicia tamén se puxo a situación en coñecemento dos axentes da Garda Civil, da Policía Local e dos efectivos de Protección Civil de Ribadeo.