Noticias destacadas no período comprendido entre as 12:00 e as 18:00 horas

Catro persoas feridas ao ser atacadas polo seu propio can no Bolo

Catro persoas tiveron que ser trasladadas na tarde de hoxe, unha delas en helicóptero, ao sufrir o ataque do seu propio can no concello ourensán do Bolo.

Ás 14:00 horas, os xestores do 112 Galicia recibiron unha chamada na que se solicitaba axuda para un grupo de persoas que sufriron diversas mordeduras dun can na parroquia de Santa María de Valdanta. Segundo a información recibida no 112, o alertante tivo que esconderse do animal para poder realizar a chamada de alerta.

Debido á gravidade das lesións, os servizos sanitarios mobilizaron a aeronave medicalizada con base en Ourense para trasladar a un dos feridos. En total, foron catro as persoas evacuadas, tres en ambulancia ao Hospital de Valdeorras e unha en helicóptero ao Complexo Hospitalario Universitario de Ourense.

Desde o Centro Integrado de Atención ás Emerxencias, alertouse á Garda Civil, ao GES de Valdeorras e aos voluntarios de Protección Civil da localidade.

Unha colisión entre dous turismos sáldase con catro persoas trasladadas en Dumbría

Catro persoas foron evacuadas ao centro hospitalario de referencia ao mediodía de hoxe tras colidir os coches nos que viaxaban na AC-552,  aproximadamente á altura do punto quilométrico 78.

Pasadas as 12:30 horas, o 112 Galicia recibiu a chamada de unha persoa particular informando dun accidente entre dous turismos na parroquia de Berdeogás. No seu relato, indicaba que despois do impacto, un dos coches caeu por unha leira.

Ao chegar no lugar dos feitos, os servizos de emerxencia confirmaron que os ocupantes de ambos vehículos atopábanse liberados e accesibles, polo que non foi necesario o uso do material de excarceración.

Finalmente, tras a valoración das lesións por parte do equipo de Urxencias Sanitarias de Galicia-061, catro feridos foron evacuados en ambulancia.

Para colaborar na intervención, desde o 112 Galicia solicitouse ademais a colaboración dos Bombeiros de Cee, da Garda Civil de Tráfico e do servizo de mantemento da vía.

Atropelo a unha menor en Carnota
Por outra banda, unha cativa foi trasladada ao Hospital Virxe da Xunqueira ao ser atropelada por un turismo no lugar de Parada.

O 112 Galicia tivo constancia dos feitos ao recibir a chamada dun particular ás 17:00 horas solicitando asistencia para unha menor ferida ao ser alcanzada por un coche.

Axiña, os xestores do 112 puxeron os feitos en coñecemento dos servizos sanitarios, do GES de Muros, da Garda Civil de Tráfico e dos membros de Protección Civil da localidade.