Noticias destacadas no período comprendido entre as 12:00 e as 18:00 horas

Falece unha motorista despois de colidir o seu vehículo contra un autobús no Grove

Unha motorista perdeu a vida na tarde de hoxe tras colidir o seu vehículo contra un autobús mentres circulaba pola PO-316, á altura do punto quilométrico 3.200, no concello pontevedrés do Grove.

Ás 14:00 horas, o 112 Galicia recibiu a chamada dun particular que solicitaba axuda para unha persoa ferida despois de chocar a moto na que viaxaba cun autobús que, no momento do accidente, transportaba pasaxeiros dunha excursión. Segundo a información facilitada aos xestores do Centro Integrado de Atención ás Emerxencias, a motorista atopábase inconsciente tras o impacto, aínda que liberada e accesible.

De inmediato, desde o 112 Galicia, activouse un operativo que contou coa participación dos profesionais de Urxencias Sanitarias de Galicia-061, dos Bombeiros do Salnés e tamén cos membros do GES de Sanxenxo e de Protección Civil da localidade.

Malia os esforzos dos equipos de emerxencia desprazados ata o lugar do sinistro, nada puideron facer por salvarlle a vida. Os axentes da Garda Civil de Tráfico e da Policía Local encargáronse de restablecer as condicións de seguridade na vía coa colaboración do persoal de mantemento das estradas. A pasaxe puido ser trasladada noutro autobús e ningún dos ocupantes resultou ferido.

Saída de vía en Cangas
Por outra banda, unha saída de vía en Cangas rematou con catro persoas feridas, tres delas menores, ao mediodía de hoxe. O accidente tivo lugar ás 13:00 horas na Avenida de Lugo, próximo a un campo de fútbol.

Nese momento, o 112 Galicia tivo constancia dos feitos tras recibir unha chamada de alerta que indicaba que un turismo saíuse da vía e chocou contra un transformador, o que provocou que a zona quedase sen subministración eléctrica no momento do accidente.

Os feridos foron evacuados polos profesionais sanitarios ata o centro hospitalario de referencia para unha revisión.

Ademais, desde o 112 solicitouse a colaboración dos axentes da Policía Local, dos membros de Protección Civil de Cangas e técnicos da empresa subministradora de enerxía. Os Bombeiros do Morrazo tamén foron avisados por se fose necesaria a súa intervención.

Unha muller, ferida tras precipitarse dunha altura en Cambados

Unha muller resultou ferida despois de precipitarse dende unha primeira planta no lugar de Laxe, no concello pontevedrés de Cambados.

Ao fío das 17:30 horas da tarde de hoxe, o 112 Galicia recibiu a chamada dun particular que solicitaba axuda para unha muller que caera dunha altura de aproximadamente tres metros mentres trataba de mover unhas caixas.

De inmediato, os xestores do 112 puxeron os feitos en coñecemento dos servizos sanitarios que mobilizaron o helicóptero medicalizado con base en Ourense para atender á ferida.

Ademais, co obxectivo de prestar apoio ao equipo médico do 061-Urxencias Sanitarias, desde o 112 Galicia pediuse a colaboración dos axentes da Garda Civil e da Policía Local, así como dos membros de Protección Civil da localidade.