Arden varias máquinas nun taller de pinturas na Coruña

O incendio produciuse no baixo do local, no que se almacenaba diversa maquinaria, que ardeu.

Malia descartarse o seu trasladado a un centro sanitario, ao atoparse en bo estado de saúde, unha persoa foi atendida no lugar dos feitos ao inhalar fume.

Tamén, os servizos de emerxencia desaloxaron, como medida preventiva, as vivendas dos catro andares do edificio no que está o taller, na Avenida de Navarra. Xa sufocado o incendio, os veciños puideron regresar, con seguridade, ás súas casas.

O 112 Galicia recibía a alerta do lume a través das chamadas de varias persoas particulares, ás 17:30 horas desta tarde. Segundo indicaban, vían saír unha gran cantidade de fume negro dun edificio.

Acto seguido, o persoal do 112 Galicia puxo a situación en coñecemento dos Bombeiros da Coruña, de Urxencias Sanitarias de Galicia-061 e da Policía Local e Nacional. Ademais, informouse do incendio ás autoridades medioambientais da Xunta de Galicia.