Un menor foi trasladado despois de ser alcanzado por un turismo en Caldas de Reis
Os servizos sanitarios de urxencia trasladaron onte a un menor que resultou ferido despois de ser alcanzado por un turismo.
Segundo a información facilitada ao 112 Galicia, o accidente produciuse ás 19:30 horas diante no Colexio Alfonso XII da localidade pontevedresa de Caldas de Reis.
Ata o lugar acudiron os membros do GES de Valga, que colaboraron cos profesionais sanitarios para a evacuación do menor ferido.
O Centro Integrado de Atención ás Emerxencias (CIAE) 112 Galicia tivo coñecemento do suceso a través dunha chamada de alerta de Urxencias Sanitarias.
Vehículo envorcado en Val do Dubra
Por outra banda, pouco antes da medianoite, un vehículo saíuse da vía e quedou envorcado cando circulaba pola Rúa Arcai, en Val do Dubra.
Como consecuencia do impacto, o condutor resultou ferido e, tras ser estabilizado polos voluntarios de Protección Civil da localidade, foi trasladado ao hospital de referencia por unha ambulancia de Urxencias Sanitarias.
Desde o Centro Integrado de Atención ás Emerxencias (CIAE) 112 Galicia tamén se informou aos efectivos do Servizo de Prevención, Extinción de Incendios e Salvamento do Xallas e de Santiago, mais o ferido estaba liberado e accesible.
Foi un particular quen chamou ao 112 Galicia para alertar, o que permitiu activar este operativo de rescate que completaron os axentes da Garda Civil de Tráfico.