Os efectivos do Servizo Municipal de Protección Civil de Barbadás rescataron onte a unha muller que se precipitou por un desnivel co turismo que conducía. Por razóns que se descoñecen, a muller, que circulaba pola estrada que une Piñor coa Barxa, ao paso polo municipio de Barbadás, perdeu o control do vehículo que conducía e caeu por un barranco de difícil acceso. Unha vez rescatada, a ferida foi evacuada por unha UVI móbil de Urxencias Médicas ao complexo hospitalario de referencia. Un familiar da afectada, que contactou co 112 Galicia despois das 18:00 horas de onte, sinalou que a muller perdera a consciencia tras o impacto. O persoal de emerxencias solicitou de inmediato a intervención de Urxencias Médicas, do GES de Pereiro de Aguiar e do Servizo Municipal de Barbadás, que, finalmente, accederon ao barranco para rescatar á ferida. Ademais, o persoal do CAE 112 Galicia pediu a colaboración da Garda Civil de Tráfico, que enviou unha patrulla ao lugar do accidente.  

 

Un choque entre un turismo e un camión que transportaba cerámica interrompeu a circulación pola A-6, á altura do quilómetro 469, no concello lucense de Baralla. Como consecuencia do impacto, a carga do camión quedou espallada pola vía e os servizos sanitarios de urxencia tiveron que atender a un dos implicados por unha dor no lombo. Ademais, os vehículos sinistrados permaneceron no medio do carril en dirección Madrid ata que puideron ser retirados polo guindastre. Ás 22:00 horas de onte, varios particulares chamaron ao 112 Galicia cuxo persoal puxo en marcha un operativo no que participaron os servizos de limpeza e mantemento do Ministerio de Fomento, a Garda Civil de Tráfico e GES de Becerreá. Tamén se desprazou ao lugar do accidente unha ambulancia de Urxencias Médicas. Por outra banda, en Ribeira, o condutor dun turismo resultou ferido despois de colidir co turismo que conducía contra un xabaril. O golpe lle provocou unha ferida aberta na cabeza, segundo explicou o particular que alertou ao persoal do 112 Galicia ás 4:20 horas desta madrugada. O accidente sucedeu na estrada de Aguiño a Palmeira, xusto na rotonda de acceso ao hospital.