Unha persoa resultou ferida en San Cibrao das Viñas ao ser atropelada por un tractor
Unha persoa resultou ferida esta mañá tras ser atropelada por un tractor que circulaba á altura do lugar de Currás, en Gargantós, no concello ourensá de San Cibrao das Viñas. Foi o mesmo condutor quen solicitaba ao CAE 112 Galicia asistencia sanitaria para unha persoa á que acababa de atropelar. De contado, o 112 Galicia puxo os feitos en coñecemento dos técnicos sanitarios que, confirmaron o traslado do ferido ao Hospital Cristal de Ourense. Así mesmo, tras recibir a alerta, a escasos minutos das 11:00 horas de hoxe, o persoal do 112 Galicia informou do suceso á Garda Civil de Tráfico, aos Bombeiros de San Cibrao e aos efectivos do GES de Pereiro de Aguiar. Do mesmo xeito, case á mesma hora, en Silleda, os servizos sanitarios trasladaron a un home que resultou ferido ao caerlle unha árbore enriba mentres cortaba leña na súa finca particular. Debido ao forte impacto, desprazouse ao lugar o helicóptero medicalizado con base en Santiago de Compostela que, finalmente, se anulou ou seu servizo por melloría do paciente. O suceso ocorreu na parroquia de Cira, no termo municipal pontevedrés de Silleda. A Garda Civil tamén foi informada dos feitos polo persoal do 112 Galicia.