Un pescador tivo que ser rescatado polos servizos de emerxencia na noite de onte ao verse en apuros nunha zona próxima ao río Miño en Chantada, Lugo. Segundo a información facilitada ao 112 Galicia polos equipos de intervención que acudiron ao lugar dos feitos, o varón estaba fóra da auga, debaixo da Ponte Nova, nun lugar de difícil acceso.

O rescate foi posible grazas ao uso  dalgunhas cordas e arneses empregadas polos servizos de emerxencia para suxeitar e izar o home que se atopaba nunha rexión vertical do encoro de Belesar.

Todo comezou ás 21:00 horas cando un particular chamou ao 112 Galicia para solicitar axuda para un amigo con dificultades para abandonar a zona lucense do río Miño onde estivo pescando. No seu relato, o alertante informaba que debido á corrente e ao crecente caudal do río, o seu compañeiro non era quen de saír polos seus propios medios.

Así, desde o Centro Integrado de Atención ás Emerxencias (CIAE) 112 Galicia, púxose en marcha un operativo que contou coa intervención de Urxencias Sanitarias de Galicia-061, dos Bombeiros de Chantada e dos axentes da Garda Civil e da Policía Local.

Tras finalizar o rescate, os membros do Servizo de Prevención Extinción de Incendios e Salvamento confirmaron ao 112 que, aínda que o pescador estaba algo atordado pola situación, non necesitaba asistencia médica.

Para colaborar no operativo, desde o CIAE tamén pasouse aviso aos voluntarios de Protección Civil de Chantada.

Veleiro remolcado en Moaña
Por outra banda, os servizos de emerxencia de Moaña realizaron o remolque dunha embarcación na parroquia de Santa Eulalia de Meira, tamén na pasada noite, sen rexistrar danos persoais.

Ao fío das 21:05 horas, un particular contactou co 112 Galicia para informar que unha embarcación necesitaba axuda para atracar ao quedarse sen goberno.

Así, desde o 112 pasouse aviso de inmediato ao equipo de Salvamento Marítimo que desprazou ata o lugar á embarcación Salvamar Mirach para remolcar o veleiro ata o peirao de Moaña.

Cómpre sinalar que o operativo tamén contou coa participación do Servizo de Gardacostas de Galicia e dos axentes da Garda Civil.