Un helicóptero de Salvamento Marítimo rescatou ás tres persoas e trasladounas ata o Aeroporto de Alvedro, onde unha ambulancia os agardaba para trasladar a un dos deportistas que resultou ferido.

O Centro Integrado de Atención ás Emerxencias (CIAE) 112 Galicia tivo constancia do suceso sobre as 17:30 horas desta tarde.

Unha persoa particular chamou, a esa hora, ao 112 Galicia para solicitar axuda. Indicaba que tres persoas que practicaban surf na praia de Valdoviño, atopábanse con dificultades para saír da auga, ademais, aseguraba que estaban illados nunha zona rochosa.

Decontado, desde o 112 Galicia pasouse aviso a Salvamento Marítimo, que mobilizou un helicóptero para o rescate das persoas. Do mesmo xeito, os xestores de emerxencias puxeron os feitos en coñecemento do Servizo de Gardacostas de Galicia e, tras confirmarse que un dos deportistas estaba ferido, informaron axiña ao Servizo de Urxencias Sanitarias de Galicia-061. Así mesmo, solicitaron a colaboración dos axentes da Garda Civil e dos efectivos de Protección Civil da localidade.

Finalmente, tras ser localizados, a aeronave rescatou aos tres compañeiros e trasladounos ata o Aeroporto. Alí, agardaba unha ambulancia para evacuar ao ferido e trasladalo ao centro hospitalario de referencia.