Un home que conducía un camión formigoneira resultou ferido esta tarde logo de envorcar o vehículo que conducía, no concello de Mondoñedo.

O 112 Galicia recibiu o aviso, ás 15:30h, a través da chamada dun particular, que informaba do sinistro, aproximadamente, no quilómetro 582 da estrada N-634, e sinalaba tamén que o condutor do camión podería precisar de asistencia sanitaria.

De xeito inmediato, os xestores do 112 Galicia puxeron os feitos en coñecemento do Servizo de Urxencias Sanitarias de Galicia-061, da Garda Civil de Tráfico, da Policía Local e de Protección Civil de Mondoñedo.

Ademais dos profesionais sanitarios acudiron ao lugar os Bombeiros de Barreiros que colaboraron co servizo de mantemento da estrada para recuperar as condicións de seguridade da vía.