Un incendio orixinado no interior dunha nave industrial de chatarra, en Poio, calcina diverso material sen causar danos persoais.
Foron varias as persoas particulares as que, a poucos minutos das tres da madrugada, chamaron ao 112 Galicia para informar dos feitos. Así, alertaban de que saía fume e lume do interior dunha nave de chatarra, situada na Avenida Peirao Besada, en Lourido.
Deste xeito, desde o Centro Integrado de Atención ás Emerxencias de Galicia (CIAE-112) notificóuselle o incendio aos Bombeiros de Ribadumia, ao GES de Sanxenxo, a Protección Civil da localidade, á Garda Civil e, como medida preventiva, aos servizos sanitarios. Ademais, tamén se desprazaron, ata o lugar, dotacións de Bombeiros dos parques de Pontevedra e do Morrazo xunto con medios forestais, para brindar apoio nas tarefas de sufocación das lapas.
Unha vez finalizada a intervención, os servizos de emerxencias confirmáronlle aos operadores do 112 que ardeu chatarra e diverso material acumulado dentro da edificación. Por fortuna, non houbo que lamentar danos persoais.