Escoitar
mércores, 5 Maio, 2021

Un operario foi evacuado de urxencia ao centro hospitalario de referencia despois de caer dunha altura duns cinco metros no municipio de Vilasantar, na Coruña.

As lesións provocadas pola caída motivaron o desprazamento do helicóptero medicalizado con base en Santiago para facilitar a atención sanitaria.

Segundo a información recollida no 112 Galicia, o accidente laboral tivo lugar ás 17:30 horas na parroquia de Présaras. Foron os profesionais de Urxencias Sanitarias de Galicia-061 os que chamaron para comunicar a mobilización da aeronave e solicitar a presenza de equipos de emerxencia para colaborar na evacuación do operario que, tras a caída, atopábase nunha zona de difícil acceso.

Así, desde o 112 puxéronse os feitos en coñecemento dos Bombeiros de Arzúa e dos membros do GES de Curtis.

Unha vez no lugar, as dotacións de intervención prestaron apoio ao equipo médico e, finalmente, o ferido puido ser trasladado a bordo do helicóptero sanitario.

Ao lugar do accidente se desprazaron os axentes da Garda Civil co fin de coñecer as circunstancias nas que se produciu o suceso. Ademais, os efectivos de Protección Civil da localidade tamén foron avisados.